දැන් මෛත්‍රී මහත්තයාට ගොඩ එන්න පුළුවන් ඔය පක්‍ෂ දෙකම අතහැරියොත් විතරයි

ගෙයිහාමි

“රාජිත මහත්තයා කියන්නෙ රවි මහත්තයාගේ සිද්ධිය ලූනු බිකක් කියලා. ඊට වඩා ඩොලර් බිලියන ගණන් හොරා කාපු අය ඒකාබද්ධ විපක්ෂයේ ඉන්නවලු* කියා හාමිනේ කියන විට,

“රාජිත මහත්තයා ඔය කතා මධ්‍යයටයි, පොදු ජනතාවටයි කියන්නෙ ආණ්ඩුව කරන්නෙ වෙන කවුරුහරි කියලා හිතාගෙනද දන්නේ නෑ. එහෙනම් ඩොලර් බිලියන ගණන් හොරා කාපු ඒවා තියාගෙන රවි මහත්තයාගේ ලූනු බික ගැන ජනාධිපති කොමිෂන් දාලා හෙව්වේ මොකද දන්නේ නෑ* කියා ගෙයිහාමි ඇසුවේය.

“එයාලට ඉතිං කෝටි ගණන් කියන්නෙ ලූනු බික්, හූනු බික්. ඔහේලාට, අපට තමයි රුපියල් දෙතුන්දාහත් මහාමේරු පර්වතය වගේ පේන්නෙ. අර මහවිලච්චිය පැත්තේ මිනිස්සු නියඟය නිසා කන්න දෙයක් නැතිව හිඳිච්චි වැව්වල නෙළුම් අල හාරගෙන කනවා. කන්න නැතුව කලන්තේ හැදෙයි කියලා ළමයි ඉස්කෝලො යවන්නේ නෑ. එහෙව් රටක තමයි කෝටි ගණන හොරා කෑවට ඒවාට ලූනු බික් කතා කියන ඇමතිලා ඉන්නෙ* කියා හාමිනේ දුකෙන් කීවාය.

“ඉතිං ඔය නෙළුම් අලේ තම්බගෙන කන මිනිහම තමයි ඡන්දෙ දීලා මේ ආණ්ඩු පත්කර ගන්නෙ. ඒකා මේකට හොරා කියනවා. මේකා ඒකට හොරා කියනවා. අන්තිමට බැලුවාම සේරම හොරු තමයි. ඒ හින්දා ඔය පක්ෂ දෙකට ඡන්දෙ දීපු එක මිනිහෙකුටවත් චූන් වෙන්න බෑ, අපේ පැත්තේ හොරු නෑ කියලා. දැන් ඉතිං කට්ටිය මේ හොරුන්ගෙන් ආපහු ඒ හොරුන්ට ආණ්ඩු බලය දෙන්න හිතාගෙන ඉන්නවා* කියා ගෙයිහාමි කීවේය.

“මෛත්‍රී මහත්තයා ඇයි දන්නේ නෑ ලූනු බිකටම ජනාධිපති කොමිසමක් දාලා හොයන්න පටන් ගත්තෙ* කියා හාමිනේ ඇසුවාය.

“ඒවා ඉතිං අපි රාජිත මහත්තයලගෙන් අහන්න ඕන ප්‍රශ්න. රාජිත මහත්තයලා ලූනු බික් කතා නොකියා මෛත්‍රී මහත්තයා ගාවට ගිහිල්ලා සර්, ලූනු බික දැන් හොයා ගත්තනේ, දැන් ජනාධිපති කොමිසන් දුසිම් තුන හතරක් දාලා රාජපක්ෂ ආණ්ඩුවේ කම්බ හොරු ටික කොටුකර ගමු කියලා කියන්න ඕන. ඩුබායි ගිණුම්වල තියෙන මුදල් ප්‍රමාණය ජනතාව දැන ගන්න ඕන කියලා රාජිත මහත්තයා කියනවා. අපි දැනගෙන අල කන්නයෑ. අපට දැනගෙන වැඩක් නෑ. අපට ඕන මේ පට්ට හොරුන්ට දඬුවම් දෙනවා බලන්න. මේ හොරා කාපු මුදල් ආපහු අයකර ගෙන ඒ සල්ලි පොදු ජනයාට සේවයක් වෙන වැඩවලට යොදවනවා දකින්න* කියා ගෙයිහාමි කීවේය.

“දැන් නම් ඉතිං මහින්ද මහත්තයාගේ ආණ්ඩුවේ හොරු ඇල්ලුවත් නැතත් මිනිස්සුන්ට යහපාලනය එපා වෙලා තියෙන්නෙ* කියා හාමිනේ කියන විට, “මිනිස්සුන්ට  යහපාලනේ එපා වෙලා තියෙන්නෙ. මෛත්‍රී මහත්තයාට යූ.ඇන්.පී. එක එපා වෙලා තියෙන්නෙ. මෛත්‍රී මහත්තයාගේ කතා ඇහුවාම යූ.එන්.පී.කාරයන්ව එපාවෙලා තියෙන්නෙ කියලා පේනවා* කියා ගෙයිහාමි කීවේය.

“ඒ හින්දා වෙන්නැති ඔය බැඳුම්කර හොරු කොටුකර ගන්න ජනාධිපති කොමිසමක් දාන්න ඇත්තේ* කියා හාමිනේ කීවාය.

“මෛත්‍රී මහත්තයාට යූ.එන්.පී. එක එපාවෙලා වගේම යූ.එන්.පී එකට මෛත්‍රී මහත්තයාව එපාවෙලා ඇති. ඇයි ඉතිං රවි මහත්තයාව කොටුකර ගන්න තියෙන වුවමනාව බැසිල් මහත්තයලව කොටුකර ගන්න නෑනේ. ජනාධිපතිවරයා කළේ රත්තරං අශ්වයන්ගේ කතා කිව්වා, එයාර්පෝර්ට් වහලා හොරු අල්ලනවා කිව්වා, මෛත්‍රී මහත්තයා දින්නෙම ඔය හොරු අල්ලන කතාව හින්දා. අන්තිමට දින්නට පස්සේ ඇල්ලුවේ නැත්තෙත් හොරුම තමයි. ඔය නඩු දැමිලි නම් හොරුන්ට බේරිලා ඉන්න අවස්ථාවක් මිසක් දඬුවම් ලැබෙන දෙයක් නෙවෙයි. දේශපාලන හොරුන්ට නඩුවක් කියන්නෙ වීරයෙක් වෙන්න හම්බ වෙන බෝනස් අවස්ථාවක්. මාස හයහත පසුවෙවී නඩුවාර එනකොට හොරු රටේ බලය අල්ලලා. ඒ හින්දා ඉක්මනට නඩු අහලා හොරු කොටුකර ගෙන දඬුවම් දෙන ක්‍රම‘වේදයක් හදන්න ඕන. ඒකට ඉතිං රටේ යහපත ගැන අවංකව හිතන, දැඩි දේශපාලන අධිෂ්ඨානයක් තියාගෙන නිවැරදි මාර්ගයේ යන්න පුළුවන් දේශපාලන නායකයෙක් ඕන. එහාට මෙහාට වැනි වැනි නිදහස් පක්ෂය ඕන, යූ.ඇන්.පී එකත් ඕන, ජනාධිපතිකමත් රැකගන්න ඕන  වගේ, ඊළඟ පාර ඡන්දෙටත් ආපසු එන්න ඕන වගේ අදහස් තියාගෙන වැඩකරලා බෑ. දැන් මෛත්‍රී මහත්තයාට ගොඩ එන්න පුළුවන් ඔය පක්‍ෂ දෙකම අතහැරියොත් විතරයි* කියා ගෙයිහාමි කීවේය.

“දෙකම අතහැරියොත් මෛත්‍රී මහත්තයාට කවුරුත් නෑනේ* කියා හාමිනේ කීවාය.

 මෛත්‍රී මහත්තයා විශේෂ ප්‍රකාශයක් කරනවා කියලා මාධ්‍ය සේරම ගෙන්වලා, මේ පක්ෂ දෙකේම ඉන්න හොරු කියලා මේ හොරුත් එක්ක රට ඉදිරියට ගෙනියන්න බෑ කියලා විශේෂ ප්‍රකාශයක් කරන්න ඕන. ඊට පස්සේ පක්ෂ දෙක තුනේම ඉන්න හොඳ මිනිස්සු ටික එකතු කරගෙන, අලුත් ආණ්ඩුවක් හදාගන්න ඕන. ඒ අනුව රටේ පාලනය හදාගන්න ඕන. රටේ ඉන්න බුද්ධිමත් උගතුන් කැඳවලා වෙන වෙනම මණ්ඩල හදලා, අධ්‍යාපන, සෞඛ්‍ය ගමනාගමන වගේ ක්‍ෂේත්‍ර ගොඩදාන විදිය ගැන සැලසුම් හදන්න ඕන. ඒ අනුව රටේ පාලනය හදාගන්න  ඕන. අන්න ඒ වගේ අලුත් ආරම්භයක් ගත්තොත් නම් මෛත්‍රී මහත්තයා ඓතිහාසික රාජ්‍ය නායකයෙක් විදිහට පරම්පරා ගණනාවක් ගරුබුහුමනට ලංවෙන නායකයෙක් වෙනවා. එහෙම නැතුව මේ විදිහට ගියොත් නම් ඉතිහාසයෙ පහළවුණු දුර්වලම, රට විනාශය කරා ගෙනගිය නායකයෙක් විදිහට මෛත්‍රී මහත්තයා හඳුන්වන එක නවත්වන්න බැරිවෙනවා.  දැන් මෛත්‍රී මහත්තයා ඔය සේරම කඩාගෙන එළියට එන්න ඕන. ඒකට මේ රටේ අවංක මිනිසුන්ගේ  සහයෝගය හම්බවෙනවා* කියා ගෙයිහාමි කීවේය.

“ඔය වැඩේ හරි යන්නේ නෑ. ඔය පක්ෂ දෙකේ කොහෙද හොඳ අවංක මිනිස්සු. මෛත්‍රී මහත්තයාට මොනවා හරි කරලා ගන්න වෙන්නෙ මේ හොරු ටික එක්කම තමයි* කියා ගෙයිහාමි කීවේය.

“ඔව්, ඒකත් ඇත්ත, ඒත් ඉතිං මෛත්‍රී මහත්තයා දැන් එළියට එන්න ඕන. මේ වැඩේ හරියන තොවිලයක් නෙවෙයි කියලා වරෙන් ඔරෝ කියන්නේ නැතුව කෙලින්ම කියන්න ඕන* කියා ගෙයිහාමි කීවාය.

“මෛත්‍රී මහත්තයා ගොඩක් ඒවා වහෙන් ඔරෝ කියන්නේ ගිරයට අහුවෙච්ච පුවක් ගෙඩිය වගේ ඉන්න හින්දා වෙන්න ඇති. රනිල් මහත්තයාගේ යූ.එන්.පී. එක එක්ක යන්නත් බෑ, මහින්ද මහත්තයාගේ ඒකාබද්ධෙ එක්ක යන්නත් බෑ. මෛත්‍රී මහත්තයා අසරණ වෙලා ඇත්තේ අප්පා* කියා හාමිනේ කීවාය.

“ගිරයට අහුවෙච්ච පුවක් ගෙඩිය වගේ ඉන්නේ නැතුව මඩේ හිටවපු ඉන්න වගේ එහාටයි, මෙහාටයි වැනි වැනිත් ඉන්නේ නැතුව හරි යන්න හරි වරදින්න හරි කෙලින් තීරණය අරගෙන වැඩකරලා ගෙදර ගියත් සැපෙන් සනීපෙන් පොළොන්නරුවෙ වැවක හීතල හුළං පාරක සුවය විඳිමින් ජීවිතේ අවසාන කාලය ගතකරන්න පුළුවන්නෙ. යුද්ධෙ දිනපු නායකයා වෙච්ච මහින්ද මහත්තයාට ඔය සැපය, සනීපය විඳින්න තාම බෑනේ. ආපහු ජනාධිපති වෙලා ආපහු පැරදුණාට පස්සේවත් ඔය අතහැරීමේ සැපය මහින්ද මහත්තයාට විඳින්න පුළුවන් වෙයිද මන්දා. ඒ පාර පැරදිලත් ආපහු ගෙදර ගිහිල්ලා ජනෙල් පියනේ එල්ලිලා දේශපාලනේ පටන් ගනියිද දන්නේ නෑ* කියා ගෙයිහාමි කීවේය.

“ඔය සැපය හරියටම වින්දේ ඩී.බී. විජේතුංග ජනාධිපතිතුමා විතරයි නේද?* කියා හාමිනේ අසන විට “ඔව් අනිත් හැමෝම තමන් කරපු කියපු දේවල් ගැන හිතහිතා තැවිතැවී ඉන්න ඇති* කියා ගෙයි හාමි කීවේය.

නදීෂ් දික්කුඹුර