ජාතියේ අප්පච්චි මහින්ද මහත්තයා නම් ජාතියේ මව වෙන්නෙ කවුද?

පිංහාමි ලණුවෙන් අල්ලා පිංගොනාව ඇද්දේය.

“වරෙන් යන්න...

“මට බෑ මහත්තයා ඕවට යන්න... මහත්තයා යන්නකෝ...  කියා කකුල් හතරම වෙර යොදා පස්සට ඇද්දේය.

“නොගිහින් හොඳ නෑනේ බං... හොඳ ගොනා වගේ වරෙන් යන්න... මං උඹට පුන්නක්කු බාල්දියක් හදල දෙනවා...  

“පුන්නක්කු බැරල් එකක් දුන්නත් රෙද්දක් ඇඳගෙන ඕවට යන්න පුළුවන්ද? මට බෑ...  කියා පිංගොනා පාරේ වාඩි උනේය.

“ඉතිං ගොනේ... උඹ රෙදි අඳිනවද? ඔහොම හෙළුවෙන්ම යමන්* කියා පිංහාමි ලණුවෙන් ඇද්දේය.

“අනේ මට ලැජ්ජයි මහත්තයා ඕවට යන්න.. අපි ලැජ්ජ බයට හැදිච්ච ගොන්නු* කියා පිංගොනා ඇඬුවේය.

“ආ... පිංහාමි මොකද මේ උඹ පිංගොනාව මස් කඩේට දක්කන්න හදනවද?* කියා ගෙයිහාමි පැමිණ අසන විට,

“අනේ මහත්තයා මම මස් කඩේට යන්න එන්නම්... ඔය ගමන නම් යන්න එන්න බෑ... මොන විලිලැජ්ජා නැති වැඩක්ද?* කියා පිංගොනා මුත්‍රා කළේය.

“කොහෙද උඹ මේ පිංගොනාව දක්කගෙන යන්න හදන්නේ* කියා ගෙයිහාමි අසන විට,

“ඇයි උඹ දන්නෙ නැද්ද? අද අපේ ජාතියේ මව අත්අඩංගුවට ගන්න හදන්නේ...* කියා පිංහාමි කියන විට,

“කවුද බං ජාතියේ මව?* කියා ගෙයිහාමි ඇසුවේය.

“ඇයි ගොනෝ ජාතියේ අප්පච්චි මහින්ද මහත්තයා නම් ජාතියේ මව වෙන්නෙ කවුද?*  කියා පිංහාමි ඇසුවේය.

“චන්ද්‍රිකා මැඩම්ද?  කියා ගෙයිහාමි ඇසුවේය.

“නෑ බොල... ජාතියේ මව ශිරන්ති මැඩම්. මහින්ද මහත්තයා ජාතියේ අප්පුච්චා උනාම ශිරන්ති නෝනා ඔටෝම ජාතියේ මව වෙනවනේ...* කියා පිංහාමි කියන විට,

‘“ආ... ඒක තමයි ඔටෝ ජාතියේ අම්මා වීම තමයි* කියා ගෙයිහාමි කීවේය.

“අද ජාතියේ අම්මට විතරක් නෙමෙයි ජාතියේ රොකට් පුතාවත් ප්‍රකාශ ගන්න කැඳවලා... මං අහන්නෙ අපිට ජාතියේ රොකට් පුතාලා දුසිමක් ඉන්නවද? ජාතියටම ඉන්නෙ එකම එක රොකට් පුතයි... ඒ පුතාට මෙහෙම කරන එක හරිද? හරි නම් අපි ජාතියේ රොකට් පුතාව හොඳට බලාගෙන පරිස්සම් කරගන්න ඕන නේද? ඔය පළිගැනීම් පැත්තකට දාලා මේ යහපාලකයොන්ට බැරිද තව රොකට් එකක් රොකට් පුතාට කියලා අහසට විදින්න... ඕන නම් මෛත්‍රී රනිල් කියල නම ගහලම යවාගන්න පුළුවන්නේ... රොකට් පුතාට මේ විදිහට නම් යහපාලකයෝ සලකන්නෙ හෙට අනිද්දා වෙද්දි රොකට් පුතා ලංකාව දාල නාසා එකට යයි... ඔන්න එතකොට තමයි යහපාලකයන්ට රොකට් පුතාගෙ අගය තේරෙන්නෙ...*

“ඇයි රොකට් පුතාට නාසා එකෙන් කතා කරලද?* කියා පිංගොනා ඇසුවේය.

“රුසියාව යුරි ගගාරින්ලා, ඇමරිකාව නීල් ආම්ස්ට්‍රෝන්ලා ගැන ආඩම්බරයෙන් කතා කරනකොට අපිට ආඩම්බරයෙන් කියන්න පුළුවන් නමකට තිබ්බෙ රොකට් පුතාගෙ නමනේ... ජනවාරි අට වැනිදා මහින්ද මහත්තයා පැරදුනේ නැත්නම් ඔය රොකට් පුතා මැදමුලන වලව්වේ ඉඳන් හඳට යන්න රොකට් එකක් හදනවා. අපේ සඳ ගමන නැවතුනෙත් මේ යහපාලන හැත්ත හින්දා...* කියා පිංහාමි කීවේය.

“හොඳ වෙලාවට මහින්ද මහත්තයා පැරදුනේ... නැත්නම් රොකට් පුතා තව මොන මොන රොකට් යවයිද දන්නෙ නෑ... තාත්තේ මට රොකට් එකක් යවන්න ඕනේ කිව්වාම හා යවපන් පුතේ කියන ජාතියේ තාත්තා කෙනෙක්නේ අපේ මහින්ද මහත්තයා* කියා ගෙයිහාමි කීවේය.

“රොකට් විතරද, තාත්තේ මට කොළඹ පාරවල් වහලා, හමුදාව දාලා, වැලි කොට්ට ගහලා රේස් පදින්න ඕනේ කිව්වාම කොළඹ නෙමෙයි ඕන තැනක පාරවල් වහගෙන රේස් පැදපන් කියන ජාතියේ තාත්තා කෙනෙක්නේ මහින්ද මහත්තයා* කියා පිංගොනා ගොම්බෙට්ටක් දැම්මේය.

“මෙහෙමයි... පිංහාමි ඔය ප්‍රකාශ සටහන් කර ගැනීමේ චූන් එක යහපාලනය බලයට ආපු දවසේ ඉඳන් දෙන චූන් එකක්නේ... යහපාලනය හිතුණ ගමන් ඔහොම චූන් දෙනවා... ඕවා සීරියස් ගන්න හොඳ නෑ...* කියා ගෙයිහාමි කීවේය.

“යහපාලන චූන් අපි සීරියස් ගන්නෙ නෑ... ඒ උනාට රාජපක්ෂ පවුල් සමග අපි ඉන්නවා කියල යහපාලකයන්ට පෙන්නන්න ඕන... ඒකයි මම මූට කතා කළේ... අපරාධ පරීක්ෂණ දෙපාර්තමේන්තුව ගාවට ගිහිල්ලා පොඩි සද්දයක් දාමු කියලා.. කෝ මූ එන්නම බෑ කියනවනේ* කියා පිංහාමි කීවේය.

“අනේ මහත්තයා රවී මහත්තයාගේ ගෙදර ගාවට යමු කියලා ගිය කට්ටිය මට කතා කළා... මම ගියේ නෑ.. ලැජ්ජයිනේ මහත්තයා මොකද මේ වීරකමක් කරලා, රට ජාතියට සේවයක් කරලා එහෙම නැත්නම් සම්මානයක් අරගෙන එනවා නෙමෙයිනේ... පට්ට හොරකමකට මාට්ටු වෙලා ඇමතිකමෙන් අස්වෙලා එන්නේ... එහෙම අයට ජයවේවා කියන්න ගොන්නු වෙච්ච අපිට නම් බෑ මහත්තයා* කියා පිංගොනා කීවේය.

“රවී මහත්තයගෙ එකට නොගියට උඹ මේකට එන්න ඕනේ...* කියා පිංහාමි කියන විට,

“ඇයි මේ කට්ටිය සම්මාන අරගෙනද ප්‍රකාශ දෙන්න යන්නේ* කියා පිංගොනා ඇසුවේය.

“එහෙම නෙමෙයි ගොනෝ... අපි රාජපක්ෂවරු සමග ඉන්නවා කියල පෙන්නන්න ඕනේ* කියා පිංහාමි කීවේය.

“උඹලා විතරක් නෙමෙයි යහපාලන ආණ්ඩුවත් රාජපක්ෂවරු සමග තමයි ඉන්නේ... මෛත්‍රී මහත්තයත් රාජපක්ෂවරු සමග තමයි ඉන්නේ... එහෙම ඉන්නවා කියන එකට හොඳම සාක්ෂිය තමයි ඔය ප්‍රකාශ සටහන් කර ගැනීමේ ප්‍රෝඩාව... පැය ගණන් ප්‍රකාශ සටහන් කර ගන්නවා විතරයි... ඔයතරම් ප්‍රකාශ සටහන් කර ගන්නේ මැල්ලුම් මලවන්නද දන්නෙ නෑ... කරුණාකරලා යහපාලකයෝ කියන්න රාජපක්ෂවරු සත පහක් හොරකම් කරලා නෑ... මිනී මරලා නෑ... රටට කිසිම වැරැද්දක් කරලා නෑ කියලා... එතකොට අපිට පුළුවන් ඊළඟ පාර මහින්ද මහත්තයලටම ඡන්දෙ දෙන්න... හැමදාම හොරු හොරු කියනවා, ප්‍රකාශ ගන්නවා, නිකං ඉන්නවා. මේ වැඩේ කරන්න යහපාලකයෝ ඕනද?* කියා ගෙයිහාමි ඇසුවේය.

‘“ඒකනේ බං... කරන මඟුලක් කරල දාන්න ඕන... නින්දෙන් ඇහැරිලා වගේ ප්‍රකාශ සටහන් කරගෙන කරගෙන යනවා... ඊට පස්සෙ නිකං ඉන්නවා... උඹ කිව්ව වගේ කියපල්ලකෝ මේ කට්ටිය සත පහක් හොරකම් කරලා නෑ... කූඹියෙක්වත් මරලා නෑ කියලා... එහෙම කියන්නෙත් නෑ... ඩුබායි ගිණුම් ගැන කියනවා, තාජුඩීන් ගැන කියනවා, රොකට් ගැන කියනවා, ප්‍රකාශ සටහන් කර ගන්නවා... ඔහේ ඉන්නවා, මොනවද මේ විකාර වැඩ* කියා පිංහාමි ඇසුවේය.

“මම යනවා මහත්තයා... මහත්තයලගෙ දේශපාලන විකාරකාරයෝ කරන වැඩ දැක්කම ගොන් අපිට ලැජ්ජා හිතෙනවා* කියා පිංගොනා යන්න ගියේය.

“මන්ත්‍රීතුමා කිව්වා බස් එක එවන්නම් ගොන්නු ටිකක් ලෑස්ති කරගෙන ඉන්න කියලා...* කියා පිංහාමි වටපිට ගොන්නු ඇත්දැයි කියා බැලුවේය.

pinhami.blogspot.com

නදීෂ් දික්කුඹුර