.අද jvp කතා අහලා මේ රටේ මිනිස්සු මහින්ද මහත්තයාට හරි ගෝටාබය මහත්තයාට හරි රටේ දේශපාලන බලය දෙනවා

.jvp ගැන බොහොම සුබවාදී ආකල්පයක තමා මම තාම ඉන්නේ ..........මෙවැනි විවේචන කරන්නෙත් ඒ නිසා ............ එදා jvp කතා අහලා මේ රටේ මිනිස්සු මයිත්‍රී මහත්තයාව ජනාදිපති කලා ....අද jvp කතා අහලා මේ රටේ මිනිස්සු  මහින්ද මහත්තයාට හරි ගෝටාබය මහත්තයාට   හරි රටේ දේශපාලන බලය දෙනවා  .මේ තත්වය ගැන jvp මොන තරම් අවබෝදයකින් පසු වෙනවද කියල මම දන්නේ නෑ .......... 
.පිංහාමි
“මහින්ද මහත්තයා චීනයෙන් ණය අරගෙන වරායක් හැදුවා. යහපාලකයො ඒ වරාය චීන සමාගමකට බදු දුන්නා. ඔන්න යහපාලනේ මහා ආර්ථික විප්ලව වැඩ කියා පිංහාමි කියන විට, 
“ඔන්න අපි බැංකුවෙන් ණයක් අරගෙන ගෙයක් හදනවා. හැබැයි සම්පූර්ණයෙන් හදාගන්න බැරි වෙනවා. ඒ හින්දා ගෙයි පදිංචියට යන්නත් බෑ. නිකං ඔහේ තියලා වැඩකුත් නෑ ඒ හින්දා ගේ කාටහරි කුලියට දෙනවා. අවුරුදු දෙකක ඇඩ්වාන්ස් එකක් අරගෙන ගෙයි වැඩ සම්පූර්ණ කරලා දෙනවා. කුලියට ඉඳලා ඒ මිනිස්සු ගියාම හොඳට හදපු ගෙයක් අපට ඉතුරු වෙනවා කියා පොඩි පුතා කීවේය. 
“අනූනම අවුරුද්දක් ඉඳලා, වරායෙන් ලැබෙන ආදායම සේරම හූරගෙන කාලා, කොළඹ වරායටත් කෙලවලා, චීන .ගියාට වැඩක් තියෙනවද? අනෙක චීනා එහෙම යන්නේ නෑ. බටහිර අධිරාජ්‍යවාදී කුමන්ත්‍රණයට නෙමෙයි. චීන අධිරාජ්‍යවාදී කුමන්ත්‍රණයට අපි අහුවෙනවා. අනික බන් අපි බැංකුවෙන් ණයක් අරගෙන ගෙයක් හදලා ඒ ගෙදර බැංකුවේ උන්ට පදිංචි වෙන්න දෙනවද? අමාරුවෙන් කාමර කෑලි දෙකක් හදාගෙන ජනෙල්වලට ඉටි කොළ ගහගෙන පදිංචි වෙලා පුළුපුළුවන් විදිහට කෑල්ලෙන් කෑල්ල හදාගෙන වැඩේ ගොඩදා ගන්නවානේ.... ඔන්න සල්ලි කීයක් හරි හම්බ වුණාම, වැලි කියුබ් භාගයකුත් සිමෙන්ති කොට්ට හතරක් පහක් අරගෙන බිත්ති ටික කපරාරු කරලා දානවා. ආපසු සල්ලි කීයක් හරි හම්බ වුණාම උළුවහු දෙක තුනක් ගන්නවා. ජනෙල් පියනක් හදාගන්නවා. පොළොවට සිමෙන්ති ටිකක් දාගන්නවා. බැංකුවේ ණය ටිකක් ගෙවාගෙන අමාරුවෙන් ළමයිනුත් හදාගෙන වේලක් හැර වේලක් කාලා අමාරුවෙන් ගේම ගහන එක නේ, බන් අපේ ක්‍රමය. මං කියන්නෙ අන්න ඒ ක්‍රමයට මහින්ද වරාය අපේ අතේ තියාගන්න තිබ්බේ. වෘත්තීය සමිතිත් කියන්නෙ මහින්ද මහත්තයාගේ මාගම්තොට වරාය බදු දෙන්න එපා, අපේ අතේම තියා ගන්න කියලනේ කියා පිංහාමි කීවේය. 
“අපි ගෙවල් හදන ක්‍රමයට මාගම්තොට වරාය හදලා නැව් එනකොට තව අවුරුදු සීයක්, දෙසීයක් යයි. එතකොට වරායවලට එන නැව් ලෝකෙ තියෙයිද දන්නෙත් නෑ... එතකොට තෙල් කියලා දේකුත් නැතිවෙයි. වරාය ගොඩදාන්න ආණ්ඩුවට සල්ලිත් නෑ... අපේ වරාය, දේශීය සම්පත් කියකියා කොළඹ වරායට එන නැවක් දෙකක් හරවලා යවලා ඔටෝ චූන් එකක් අරගෙන ඉන්න පුළුවන්. මේ ආණ්ඩුව කියනවනේ හම්බන්තොට වරාය මහින්ද මහත්තයා චීනෙට පවරන්න හැදුවා, හැබැයි ඒ දීපු විදිහට දුන්නා නම් ආණ්ඩුවට සතපහක් වත් හම්බවෙන්නේ නෑ කියලා. හැබැයි මේ යහපාලන ආණ්ඩුව පවරපු විදිහෙන් ආණ්ඩුවට විශාල මුදලක් ලැබෙනවා කියලා. දැන් මේ ලෝක ආර්ථිකයේ ගමන් කරන විදිහට අපට මේ පරණ වලව්කාරයො වගේ ගරාවැටිච්ච වලව්ව රැකගෙන අපේ දේ කියකියා ඔහේ ඉන්න බෑ. වලව්වත් එක්ක ඉඩම හොඳ ගාණකට විකුණලා වෙන කොහෙන් හරි හොඳ ගෙයක් අරගෙන ඉතුරු ගාණ පොතේ දාගෙන හොඳට කාලාබීලා ජීවත් වෙන එකයි තියෙන්නෙ කියා පොඩි පුතා කියන විට, 
“එතකොට ඉතිං වෙන්දේසිකාරයො වලව්ව කඩලා දාලා ඉඩම පර්චස් දහයේ කෑලිවලට කඩලා පෙට්ටි මොඩ්ල් ගෙවල් හදාලා කෝටි ගණන්වලට විකුණයි කියා පිංහාමි කීවේය. 
“එහෙම තමයි ආයෝජන කරනවා කියන්නෙ. එහෙම නැතුව වලව්ව ගන්ත ගාණටම පර්චස් දහයේ කෑලි කඩලා ගෙවල් හදලා විකුණනවාද? වලව්ව සල්ලි දීලා ගන්න ගාණයි ඊට පස්සෙ පර්චස් දහයේ කෑලි කඩලා ගෙවල් හදලා විකුණන ගාණයි සන්සන්දනය කරලා පාඩුව මෙච්චරයි කිව්වාම ඒක හරිද? අන්න ඒ වගේ තමයි ඔය වරාය වැඩෙත්. මොකද ඔය වරාය බදු ගන්න චීන කොම්පැණිය දාන මාන දෙන පිං අතේ වැඩ කරන සමිතියක් නෙමෙයිනේ... ලාභ උපයන්නනේ වරාය බදු ගන්නෙ. නැත්නම් මේ අපට ආදරේට නෙමෙයි නේ. වරාය තනියම අපට ගොඩදා ගන්නත් බැරි නම්, බදු දීලා ගාණක් අරගෙන ඉන්නේ නැතුව, අර බලන්නකෝ මුන් වරායෙන් හම්බු කරන හැටි කිය කියා හූල්ල හූල්ල අපට හම්බ වෙච්ච ගාණයි කොම්පැණිය උපයන ගාණයි සසඳලා පාඩුව මෙච්චරයි අච්චරයි කියන එක හරිද? කියා පොඩි පුතා ඇසුවේය. 
“ඒ වුණාට බන් මේ අපේ සම්පත් න්... හෙට උපදින අපේ දුවා දරුවන්ට මොනවද ඉතුරු වෙන්නේ... උන් අපට සාප කරයි රට විකුණුවා කියලා කියා පිංහාමි කියන විට, 
‘“ඔය ඉතිං වාමාංශික උච්චාරණයෙන් කියන කතා නේ... අනාගතේ ඉපදෙන එවුන් ඔහොම හිතන්නේ නෑ. උන් දන්නවා මේක තමයි සිස්ටම් එක කියලා. ඔය තනි රටේ දේශප්‍රේමය අරවා මේවා අනාගතයේදී ඉවර වෙලා මුළු ලෝක ආර්ථිකයට එකඑක රටවල ආයෝජන බදුදීම් මිලට ගැනීම් මත ගොඩ නැගෙනවා. එතකොට ඔය දේශප්‍රේමී බයිලා, බයිලා විතරක්ම වෙනවා. 
අනික ඔය අපේ සම්පත් හෙට උපදින දරුවන්ට රැකලා දෙන්න නම් මහින්ද මහත්තයාට, රනිල් මහත්තයාට, මෛත්‍රී මහත්තයාට බලය දීලා හරියන්නේ නෑ. එහෙම නම් ජේ.වී.පී. එකට බලය දීලා අනුර කුමාර සහෝදරයාව රටේ ජනාධිපති කරවන්න. ඒ වැඩේට මාත් කැමතියි. හැබැයි ඒ වැඩේට මේ රටේ ගොඩක් එවුන් කැමති නෑනේ. යූ.එන්.පී. එකට බලය දීලා වරාය විකුණනවාය, තෙල් ටැංකි විකුණනවාය, සයිටම් වහන්නෙ නෑනේ කියලා බොරුවට බුරලා වැඩක් නෑ. අනුර කුමාර සහෝදරයා ජනාධිපති වෙලා කරන්න ඕනේ වැඩේ රනිල් මහත්තයා ලව්වා කරගන්න හදනවා වගේ වැඩක් නේ මේ කරන්න හදන්නේ. 
අනික රටේ සම්පත් විකුණලා... සයිටම් වගේ පෞද්ගලික වෛද්‍ය විද්‍යාල ආරම්භ කරලා, පොදු ජනයා අතර යූ.එන්.පී. එක පජාත වෙලා, ඡන්ද නැති වෙනවා නම් හොඳයි නේ... ඔය කියන තරම් පොදු ජනයාට, රටට හානියක් වෙනවා කියලා පොදු ජනයාටම දැනෙනවා නම් මේ ධනපති පක්ෂ ප්‍රතික්‍ෂේප වෙන්න එපැයි. මේ විකාර අරගල නිසා මේ අරගල වලට බය වෙලා ආණ්ඩුව රටේ සම්පත් විකුණන එක නවත්තලා සයිටම් එක වහලා දැම්මොත් ආණ්ඩුව ගොඩදාලා තියෙන්නේ ජේ.වී.පි. එක වෙනවා. පෙරටුගාමී වෙනවා. ඇයි ඉතිං රටට අහිතකර ජනයාට අහිතකර දේ වැළැක්වුවේ ජේ.වී.පී. එක, පෙරටුගාමී කියලා ඔය පොදු ජනයා එයාලට ඡන්දෙ දෙනවද.... එල්.ටී.ටී.ඊ. එක යුද්ධයෙන් පරාජය කරන්න පුළුවන් කියලා මහින්ද මහත්තයා එදා හිතුවද, ජේ.වී.පී. එක, හෙළ උරුමේ යුදවාදී මතවාදය හදලා දුන්නා. මහින්ද මහත්තයා ඒක කර තියාගෙන ගිහිල්ලා යුද්ධය දින්නා. ජේ.වී.පී. එකට හුළං... මහින්ද මහත්තයා ගෙදර යවන මතවාදය හදලත් ජේ.වී.පී.යට හුළං... හොඳට හිතලා බැලුවාම දැන් තේරෙනවා ධනපති නායකයන්වයි ධනපති ආණ්ඩුවයි ගොඩදාලා තියෙන්නේ ජේ.වී.පී. එක කියලා... මේක හරියන තොවිලයක් නෙමෙයි කියලා ජේ.වී.පී. එක තේරුම් ගන්න ඕන. මේ මොහොතේ ජේ.වී.පී මතවාදය හින්දා මහින්ද මහත්තයා හරි ගෝඨාභය මහත්තයා හරි ගොඩයන පාටක් පේන්න තියෙනවා* කියා පොඩි පුතා කීවේය. 
“ඉස්සර ජේ.වී.පී. එකට කඩේ ගිය උඹ දැන් ජේ.වී.පී. එක සැරට විවේචනය කරන්නේ මොකද බන්* කියා පිංහාමි ඇසුවේය
“අනුර කුමාර සහෝදරයා මේ රටේ ජනාධිපති වෙනවා නම් මට ගොඩක්ම කැමැතියි. හැබැයි ධනපති නායකයන්ගෙන් සමාජවාදී වැඩ කරගන්න එකට මම විරුද්ධයි. මේ සිස්ටම් එක ඒ ක්‍රමයෙන් පරාජය කරන්න බෑ. පොදු ජනයාට මේ ධනපති ක්‍රමයෙන් දැනෙන පීඩනයට වඩා පීඩනයක් 88–89 කාලේ මතක් වෙලා දැනෙනවා නම්, එතැනත් අවුලක් තියෙනවා. ජේ.වී.පී. එක තමන්ගේ ගමන් මාර්ගය වෙනස් කළේ නැත්නම් දෙදාස් විස්සේ නෙමෙයි තුන්දාස් විස්සේදීවත් රටේ දේශපාලන බලය ගන්න හම්බ වෙන්නේ නෑ කියා පොඩි පුතා කීවේය 
නදීෂ් දික්කුඹුර